S24 ..og þú hagnast

Nánar

Af hverju þarf að greiða í lífeyrissjóð?

Samkvæmt lögum um skyldutryggingu lífeyrisréttinda og starfsemi lífeyrissjóða 129/1997 skulu allir launþegar og sjálfstæðir atvinnurekendur greiða í lífeyrissjóð og ávinna sér og sínum þannig réttindi til greiðslu lífeyris við starfslok. Til að öðlast lágmarkstryggingarvernd skal greiða a.m.k 10% af launum. Sjóðfélagar geta greitt meira í lífeyrissjóð og er iðgjald umfram lágmark frjálst viðbótargjald. Sjóðfélagar geta ráðstafað viðbótariðgjaldinu í séreignasjóð eða inn á lífeyrissparnaðarreikning fjármálafyrirtækis.

Hvers vegna er mikilvægt að greiða í lífeyrissjóð?

Með greiðslu í lífeyrissjóð ávinnur þú þér rétt á lífeyrisgreiðslum til æviloka auk þess að ávinna þér og fjölskyldum þinni örorkulífeyrir við starfsorkumissi og maka- og barnalífeyrir við fráfall.

Ég á lífeyrisréttindi í mörgum lífeyrissjóðum. Get ég flutt þau í einn sjóð?

Nei, samkvæmt lífeyrissjóðalögunum er bannað að flytja réttindi milli lífeyrissjóða meðan einstaklingar eru á vinnumarkaði og greiða í lífeyrissjóð. Hins vegar áttu réttindi og má sameina þau eftir að einstaklingur er hættur að vinna og hefur töku lífeyris.

Get ég tryggt mér lágmarkslífeyri með því að greiða í séreignarsjóð?

Nei, til þess að þú tryggir þér lágmarkslífeyri verður þú að greiða í lögbundinn lífeyrissjóð.

Hver er munurinn á lágmarks- og viðbótarlífeyrissparnaði?

Lágmarkssparnaður er 10% af heildarlaunum og er það iðgjald sem allir verða að greiiða í lífeyrissjóð. Allt um fram lágmarkslífeyrissparnað (10%) flokkast undir viðbótarlíferissparnað.

Hvað má ég greiða í viðbótarsparnað?

Þú getur samtals lagt fram 2% af launum þínum og fengið 2% mótframlag frá launagreiðanda. Alþingi samþykkti í desember 2011 að breyta tekjuskattslögum á þann veg að heimild til frádráttar iðgjalda í viðbótarlífeyrissparnað frá tekjuskattsstofni verði 2% í stað 4%. Lækkunin gildir á árunum 2012 til 2014.

Einstaklingar þurfa ekki að gera neinar ráðstafanir vegna þessa því samkvæmt lögunum ber launagreiðanda að lækka iðgjaldið nema launþeginn óski eftir að greiða áfram hærra iðgjald en 2%.

Athygli er vakin á að engin breyting verður á mótframlagi launagreiðenda en það er 2% af launum skv. flestum kjarasamningum.

Sjá nánar hér

Ætti ég að hefja viðbótarlífeyrissparnað?

Já. Kostir þess að verað með viðbótarlífeyrissparnað eru margir. Má þar nefna mótframlag launagreiðanda, tekjuskattsfrestun, enginn fjármagns-, eigna- né erfðaskattur er greiddur af sparnaðinum. Einnig má líta á viðbótarlífeyrissparnaðinn sem líf- og slysatryggingu þar sem hann greiðist út við andlát eða örorku. (skv. lögum nr. 129/1997). Með því að leggja til hliðar í viðbótarlífeyrissparnaði leggur þú grunninn að meiri lífsgæðum við starfslok sem jafnframt geta verið sveigjanleg.

Hvert er mótframlag launagreiðanda?

Flest stærri launþegasamtök hafa samið um aukamótframlag frá launagreiðanda og er það á bilinu 1-2%, misjafnt eftir kjarasamningum.

Eru einhverjir gallar við viðbótarlífeyrissparnað?

Við vissar aðstæður getur viðbótarlífeyrissparnaður skert bætur frá almannatryggingum en hjá því ætti að vera hægt að komast. Með því að hefja viðbótarlífeyrissparnað minnka ráðstöfunartekjur en að okkar mati vega kostirnir það fyllilega upp. Þess ber einnig að geta að eignin er bundin til 60 ára aldurs.

Hverjir eru kostir viðbótarsparnaðar?

Mótframlag atvinnurekanda, sparnaðurinn er frádráttarbær frá tekjuskattsstofni, frestun á tekjuskatti, eign erfist, enginn eignaskattur og enginn fjármagnstekjuskattur.

Hvernig er útborgun háttað?

Samkvæmt lögum nr. 129/1997 getur rétthafi þegar hann er orðinn 60 ára fengið greiddan lífeyrissparnað með jöfnum árlegum greiðslum á ekki skemmri tíma en 7 árum, eða á þeim tíma sem rétthafa vantar upp á 67 ára aldur.

Hvað gerist við andlát rétthafa?

Samkvæmt lögum nr. 129/1997 fellur innistæða rétthafa til erfingja hans eftir reglum erfðalaga ef rétthafi fellur frá áður en hún er að fullu greidd. Hlut eftirlifangi maka ber að skipta með jöfnum greiðslum á 7 ár eða á þann tíma sem makann vantar á 67 ára aldur við andlát rétthafa. Hlut barns undir 13 ára aldri ber að skipta með jöfnum greiðslum á þau ár sem vantar á að barnið nái 18 ára aldri. Hafi barn náð 13 ára aldri við andlát rétthafa skal hlutur þess greiddur út á 5 árum.

Hvernig er skattlagningu við erfðir háttað?

Ekki er greiddur erfðafjárskattur og hægt er að nýta ónýttan persónuafslátt til lækkunar á þeim tekjuskatti sem greiddur er út af útborgaðri innistæðu.

Hvernig fer með útborgun við örorku?

Við varanlega örorku má launþegi taka viðbótarsparnaðinn út skv. ákveðnum reglum. Það fer eftir því hversu há öryrkjaprósentan er, en hún þarf að vera a.m.k. 50% og greiðist viðbótarsparnaðurinn út í sama prósentuhlutfalli. Eignin er greidd út á 7 árum.

Get ég valið mér lífeyrissjóð?

Ef aðild að lífeyrissjóði er tilgreind í kjara- eða ráðningarsamningi launþega verður hann að greiða í viðkomandi lífeyrissjóð. Ef hins vegar ekkert er tekið fram um aðild að lífeyrissjóði í kjara- eða ráðningarsamningi getur viðkomandi valið sér lífeyrissjóð sem reglur einstakra lífeyrissjóða leyfa.

Aðgerðir

• Sækja um
• Hafa samband
• Reiknivélar

Vextir, gjaldskrá og gengisreiknir